تحب أخونك إزاي؟؟؟؟؟؟؟؟؟؟
سؤال صدمه
بس مهم
تحب شريك حياتك يخونك إزاي
طبعا مش بياخد رأيك قبل ما يخون
بس ده تنبيه لكل واحد عايز يحافظ على حياته مستقره بدون صدمات أو كوارث
والمسأله ببساطه كل واحد مننا ممكن يجبر شريك حياته على الخيانه ويشده لها بكل حماس
الواحد بيعرف غير شريك حياته بسبب الااحساس اللي بيحسه مع الشخص الجديد
- لما تكوني أو تكون مش بتحاسب على كلامك و – لا مؤاخذه – بتحدف كلام زي الدبش
ده يخلي شريكك يدور على الكلمه الحنينه والرقة في الأسلوب
ممكن تقول أنا طيب ومش قصدي ومش معقول الواحد يرتب كلامه قبل ما يقوله حتى في البيت حرام
أو تقولي
خليني على حريتي وهو عارف طبعي وفاهم أني مش قصدي أضايقه بس أنا طبعي كده وبلاش تكتيفه والمفروض يفهم قصدي مش كل مره هافتح بقي هافكر وأرتب الكلام
بس ده غلط غلط غلط
المفروض تكون رقيق الأسلوب منمق الكلمات وتحافظ على شعور شريك حياتك أكتر من أي حد تاني
يا ناس دا الرسول الكريم عليه أفضل الصلاة والسلام قال الكلمه الطيبه صدقه
- لما تكوني أو تكون مش مهتم بشكلك أو ملابسك
صحيح الواحد مش بهدومه ولا بشكله الواحد بشخصيته وقلبه الطيب
بس حاولي تفهمي انه حتى لو شريكك بيحبك زي ما أنت بعبلك بس أكيد شكلك المبهدل هايحرجه مع الناس
ولو أنت شايف أن ذقنك المنبته وشعرك المنكوش والألوان الغير متناسقه اللي بتلبسها مش فارقه معاك وأنها حبتك كده ومش فارق معاها
ده معناه أن تقديرك لنفسك أقل من المفروض
الست اللي شايفه أن البيت والأولاد بياخدو كل وقتها ومش قادره ولا فاضيه تهتم بنفسها بتغلط غلطه ممكن تكلفها زواجها وراحة أعصابها
ولازم نكون متأكدين من حقيقه مهمه هي أن الشكل الخارجي للشخص بيأثر على حالته من الدخل
يعني لو زعلان هتبان عليك البهدله ولو مبسوط هاتلبس أحلى حاجه وتتشيك وترش برفان
افتكر أيام الخطوبه وأول خروجه وأول عيد وأنت تعرف
والعكس صحيح
يعني لو حابب تغير من نفسيتك التعبانه خد دش حلو واحلق ورش برفان والبس حاجه حلوه وسرح شعرك وحاول تخرج
أكيد هايفرق
يعني من الآخر أنت بتتشيك لنفسك أولا
والكلام ده للستات كمان
يعني لما بتكوني حلوه ومتشيكه وبشرتك ناعمه وريحتك برفان وشعرك على الأقل مغسول ومسرح وملموم ولابسه على أقل تقدير عباية بيتي نظيفه وشكلها مقبول (ده الحد الأدنى)
بشكل شيك كده بتوضحي أنك انسانه مرتبه ونظيفه وذوقك حلو وعارفه أنك تستاهلي شوية اهتمام وتقدير أنك بعد شغل البيت والاهتمام بالأولاد وحتى لو عندك شغلك بعد كل ده بتحافظي على شكلك مهندم ومرتب
الواحد بشكل لا شعوري بيدور على الناقص في شريكه عند الناس التانيين
أو على الأقل بيلفت نظره الشياكه والتناسق
- لما تكوني أو تكون عصبي وتثور بسبب وبدون سبب
ده معناه ضمنا أنك مش بتقدر ظروف شريك حياتك ومش فارق معاك زعله ومش حاسس بالضغوط اللي بيمر هو كمان بيها
يعني أنت الأول وبعدين الناس
وبعدين لما مايعجبكش العجب وأي حاجه بتشوف عيوبها قبل مميزاتها
ده معناه اضافة أعباء جديده للحياه
على أساس ان الدنيا بمبي بمبي ومش ناقصها إلا نكد سيادتك
وكل حياتي متوقفه على إسعاد جنابك
وطلباتك أوامر
وحرام كده
لازم نتحمل بعض
أكيد هاتمر بظروف تكون فيها محتاج لحد يتحمل تصرفاتك ويصبر عليك
يعني لو كل واحد عصبي وحنبلي حط نفسه مكان الطرف التاني وجرب
هايحس أنه زي الكوره بينضرب في الحيطه ويرجع يرد تاني
بس كده حرام
المفروض يكون فيه هدوء وسكينه تغلف الحياه الخاصه بين الطرفين
الحياه مش ناقصه شد وجذب
- لما تكوني أو تكون مهمل في صحتك ووقتك
يعني كده باختصار أنت كاره الحياه مع شريك حياتك وعايز تقصر وقتك معاه وتجيب من الآخر
هو ده معناه إيه غير كده
الاهمال في الصحه والوقت مش معناه زيادة التفاني في الشغل عشان توفر حياه كريمه لأسرتك
وبهدلة الصحه والانشغال المستمر في حاجات كتير طول الوقت مش معناه الوصول للكمال في ترتيب البيت وتربية الأولاد وتعليمهم
يا ناس الشغل مش هايخلص طول العمر
الأولاد هما اللي هايكبروا وهاتفوت طفولتهم مش هاتحس بيها
وتتفاجئ أن ابنك الصغير الجميل كان طول الوقت نفسه يلعب معاك أصبح شاب له أصحابه ووقته الخاص اللي بيحب يقضيه معاهم
وبنتك الجميله الرقيقه أصبحت شابه محتاجه الخصوصيه وأصبح عندها هوايات وأفكار أنت ماتعرفش عنها حاجه
ولما تشغلي نفسك طول الوقت بشغل البيت ونظافة السجاد وتلميع الفضيه هاتطتشفي أنك تحولتي من الاهتمام بالأشخاص للإهتمام بالأشياء
والأشياء الماديه مش محتاجه حنان وتربيه
البني ادم أهم من طقم الكاسات
ولو فيه كرسي عليه تراب شوية تنفيض هاتنظفه
بس لو فيه انسان اتغير وبعد من غير ما نحس صعب جدا نقرب له تاني
جزء مننا بيضيع معاه
- لما تكوني أو تكون أناني
ببساطه مافيش حد بيعترف بالتهمه دي
الكل بيقول أنه بيعمل اللي عليه
مافيش حد بيعترف أنه بيحط نفسه الأول وكل الناس بعده
مافيش واحد بيقول أنه أهم حاجه راحته وسعادته وأكله ولبسه وفسحته
مافيش حد بينسى في الزحمه أن العلاقه بين اتنين هي الاستثمار الأفضل في الحياه
وأن الزواج هو المشروع صاحب أعلى نسبة أرباح
كلما استثمرت فيه زادت أرباحك
وكلما اهتميت زادت سعادتك
يا ناااااااس افهموا
لما اتجوزنا اخدنا قرار ضمني اننا نكون سعداء ونهتم ببعض
راح فين الكلام ده
لازم كل شويه نقف ونراجع حياتنا ونشوف احنا كنا فين ورايحين فين
حرااااااااام العمر يضيع في عذاب ومشاكل
أنت كإنسان تستحق السعاده
دور عليها واتعب نفسك شويه للمحافظه عليها
الرئيسية 
أحدث الصور 
السبت سبتمبر 05, 2009 5:48 am